“Where a Capricorn’s heart truly lies”
🌊 လောကဓံတရားက သူ့အတွက်အလုပ်သွားအလုပ်ပြန် နှုတ်ဆက်နေကြလူတစ်ယောက်နဲ့တူတယ် ။ သူဟာအရွယ်မတိုင်ခင် သီးပွင့်တဲ့သစ်ပင်ဖြစ်တယ် ။ ဉာဏ်စမ်းစာမေးပွဲတွေ လမ်းချိုးကွေ့တိုင်းဆုံလေ့ရှိပြီး သူရဲ့ဓါးကိုအမြဲတမ်းသွေးလာနေရတယ် ။ အဆွေးဓာတ်ဟာ သူ့ရင့်ကျက်ခြင်းငှာမြေသြဇာဖြစ်တယ် ။ ပျော်ရွှင်မှုတန်ဖိုးကို အဖိုးအခကြီးကြီးသင်ယူတယ် ။ အရှိအတိုင်းသိခြင်းက လူကိုအဆိုးမြင်စေသတဲ့ ။ သူပိုနားလည်လာလေ အလိုလိုဘေးရောက်လာတယ် ။ သူတမင်ဘေးထွက်လိုက်တာလို့တော့ ပြောတာပဲ ။ ဘယ်လိုပဲဖြစ်ဖြစ်သူဟာ ရှင်သန်အထမြောက်ခြင်းရဲ့ Phoenix ငှက်ငယ် ။ ဘဝဇာတ်ခုံမှာ အောက်ခြေသိမ်းဘဝကမင်းသားဖြစ်လာတဲ့လူ ။ ရေထဲမိုးထဲတိုးဝင်ရဲသလို ၊ မုန်တိုင်းထဲရယ်ကြဲကြဲသွားနိုင်တဲ့သူ ။
🌊 ဒီလိုတစ်ယူသန်ခေါင်းမာခြင်း အထီးကျန် အဆိုးမြင်ဟန်ရှိတဲ့သူ့နှလုံးသားဟာ ကျောက်ခဲတစ်လုံးဖြစ်နေရင် ဘယ်သူမှထူးဆန်းကြမယ်မထင်ဘူး ။ ဒါပေမယ့် Plot twist ကဒီလိုလာတယ် ။ လူတိုင်းလိုပဲ ဒီဇာတ်ကောင်မှာလည်းပျော့ကွက်ရှိတယ် ။ သူဟာသူ့ရဲ့အသက်ဓာတ်ကို မိသားစုမှာဝှက်ထားပါသတဲ့ ။ သူဟာခြေလှမ်းတတ်စအရွယ်ကတည်းက တာဝန်သိဖို့ကြီးပြင်းလာတယ် ။ အထုပ်အပိုးတွေခွဲယူဖို့ ၊ ဆင်းရဲခြင်းကွင်းဆက်ဖြတ်ဖို့ ၊ ဘဝကိုနောက်တစ်ဆင့်ပစ်တင်ဖို့ ၊ အသိအမှတ်ပြုမခံရတာတွေသက်သေပြဖို့ ။ ဒါတွေကြောင့်သူဟာလေးပင်တယ် ၊ သူ့ရည်မှန်းချက်ဟာ သေးကွေးခွင့်မရှိဘူး ။ ကလေးစိတ်တစ်ဝက်မှာရင့်ကျက်ရတဲ့အတွက် မလိုက်မဖက်ဝါသနာတွေ ၊ ကလေးဆန်ဆန်ဝယ်ခြမ်းမှုတွေ မဆီမဆိုင်တွဲပါတယ် ။ ဒါတွေဟာသူ့နည်းသူ့ဟန် ငယ်ဘဝကို ဖာထေးဆေးထည့်ခြင်းဖြစ်တယ် ။
🌊 မိသားစုမတည်ငြိမ်ခြင်းက ဘယ်သူ့အတွက်မှမကောင်းပေမယ့် သူ့အတွက်ကျ ခြေတစ်ဖက်ဆုံးရှုံးရခြင်းနဲ့တူတယ် ။ စိတ်ကျခြင်းနဲ့ မကြာခနစစ်ခင်းရတဲ့အခါ ကျောထောက်နောက်ခံဟာအရေးပါကြောင်း သူအသိဆုံး ။ ရှင်သန်ရခြင်းအကြောင်းတရားနဲ့ အသက်ရှူသွင်းရှူထုတ်လုပ်သူအတွက် Purpose ကသိပ်အရေးပါတယ် ။ သူကျောပေးထားတာက တစ်ဖက်ကိုရင်ဆိုင်ပေးနေတာဖြစ်တယ် ။ ဆူပူတဲ့အိမ် ၊ စိတ်မလုံခြုံစေတဲ့လက်တွဲဖော်ဟာ သူ့သံချပ်ကာကြားစိုက်ဝင်နေတဲ့မြားတဲ့တူတယ် ။ အရေထူသလိုနဲ့ နာစရာစကားတစ်ခုက Trauma အဖြစ် သူ့ရထားကိုလမ်းချော်သွားစေတယ် ။ ထော့နင်းနင်းအသားကျသွားတဲ့အခါ ဘေးအကူအညီမယူချင်ဘူး ။ အားနည်းဟန်မပြဘူး ။ သူဟာဓာတ်ကြမ်းကုရတာပိုကြိုက်တယ် ။ ခံစားချက်သေချာ Express မလုပ်ပြတာနဲ့ နှလုံးသားကြီးကြီးတွဲလျက်ရှိနေတာ အတော်ရှင်းရခက်တဲ့သူ့ရဲ့ပြသနာ ။
🌊 သူဟာတခါတလေ နာမည်ကောင်းမရတဲ့ဖခင်နဲ့တူတယ် ။ လူတွေအိပ်ချိန်မှ အသံတိတ်ရွာသွားတဲ့မိုးနဲ့တူတယ် ။ တိုက်အမြင့်ကြီးတွေအောက်က လူမြင်မခံရတဲ့ Foundation အုတ်မြစ်နဲ့တူတယ် ။ ငယ်ငယ်ကစားကြတဲ့ ပျော့သလိုနဲ့မာ-မာလိုလိုနဲ့ပျော့တဲ့ ကျောက်စလစ်ခဲပုံစံချောကလက်လေးတွေနဲ့လည်းတူတယ် ။ တကယ်တော့သူဟာ အမှန်တရားကို ၃၆၀ ဒီဂရီမြင်ခွင့်ရပြီး ပတ်ချာလည်မူးနေတဲ့သူ ။ ခံစားချက်မရှိသလိုလိုနဲ့ နှလုံးသားအကြီးကြီးရှိတဲ့သူ ။ နှလုံးသားနဲ့လူ တွဲလျက်မတွေ့ရသူ ။ စစ်ပြင်စရာများလို့ အသက်ကိုချစ်ရသူဆီအပ်ထားတဲ့သူ ။ ဒါ့အပြင်သူဟာ များများသိလေ မသိတာများလာလေဆိုတဲ့သူ ။ အထင်အမြင် အလွဲအခံရဆုံးသူ ။ ယုန်တောင်ပြေးခွေးမြောက်လိုက် ၊ ခုတ်ရာတခြားရှရာတလွဲလူ ။ အပြောမတတ်သူ ၊ ပြောမထွက်တဲ့သူ ။ သူ့အင်ပါယာမှာ အပ်ကျတာအစသိသလောက် ၊ အခြားနယ်နိမိတ်ကို နှံစပ်မကျွမ်းကျင်တဲ့သူ ။
သူဟာ တစ်ကိုယ်ထဲသမားအရည်ခြုံထားတဲ့ မိသားစုစိတ်ဓာတ်နဲ့လူ ။
Note: This is not an astrology-related post. It is a pure fictional story based on some Capricorn traits and is intended for entertainment purposes only.
0 comments:
Post a Comment